आत्मभान निर्देशित ध्यान प्रशिक्षण शिबीर हा आत्मभानच्या ध्यान, ज्ञान, भावना आणि शरीरस्वास्थ्य या घटकांच्या व्यापक पटलावरचा एक लहानसा भाग आहे. हा तीन तासांचा निर्देशित ध्यानाचा अनुभव तुमच्या मन, बुद्धी, आत्मा आणि शरीर या चारही घटकांकडे साक्षीभावाने, आत्मभानावर येत पाहण्याचा दृष्टिकोन देईल.

‘आत्मभान’ म्हणजे काय, असा प्रश्न सर्वप्रथम डोळ्यासमोर उभा राहतो. आत्मभान म्हणजे वर्तमानकाळात, त्या क्षणात सातत्याने, जागृतपणे अंतरसृष्टीत व बाह्यसृष्टीत काय सुरु आहे याचे भान असणे. मग आपल्या अंतरातल्या आणि बाह्य परिस्थितीला भान असणे खरेच इतके कठीण आहे का, हाही प्रश्न मनात डोकावून जातो. ध्यानगुरू अश्विन देशपांडे म्हणतात की मनुष्य त्याच्या आयुष्यात ९८% वेळेस बेशुद्धीतच जगत असतो, त्याला भानावर यावे लागते, त्याला चेतनजागृती करावी लागते. त्यासाठी ज्ञानसाधनेसोबतच ध्यानसाधना आवश्यक ठरते. चेतनाजागृतीसोबतच रोजच्या आयुष्यातील अनेक समस्या जसे की अतिविचार, ताणतणाव, एकाग्रतेची कमतरता, आत्मविश्वास नसणे यापासून ते विविध शारीरिक समस्यांचे समाधान करण्याची किमया ध्यानसाधनेने साधता येते.

आता ‘निर्देशित ध्यान’ म्हणजे काय?
ध्यानाच्या बाबतीत असा उगाच एक समज आहे की एखादं आसन घेतलं, मुद्रा केली आणि डोळे मिटले की ध्यान साध्य झालं, पण ते इतकं सहजसाध्य नाही. ध्यान ही एक साधना आहे, जी साधता साधता साधते. त्यामुळे ध्यानाचा प्रवास सुरु करताना त्या मार्गावर कोणीतरी वाटाड्या हवाच, guide हवाच. ‘निर्देशित ध्यान’ (Guided Meditation) म्हणजे अशी ध्यानपद्धती जिथे ध्यान करत असताना तुमचे Guide, तुमच्या निर्देशक ध्यान करताना प्रत्येक पावलावर येणाऱ्या विविध समस्यांवरील समाधान शोधण्यासाठी मदत करतात. ‘आत्मभान’ ध्यानक्रियेमध्ये निर्देशक ध्यानगुरू अश्विन देशपांडे तुमच्या मनाला, बुद्धीला, शरीराला सूचना देऊन, तुमच्या स्वयंसूचनेच्या व्यवस्थेला जागृत करून, तुम्हाला ध्यानाच्या, आत्मभानाच्या मार्गावर एक एक पाऊल पुढे टाकण्यास मदत करते.